移民循環三十年

早前見到香港局勢不穩，移民之聲四起，於是寫了一篇《離卦與移民》，最近剛好碰到移民公司顧問何生，問佢情況如何。顧問何約四十幾歲，上一次香港發生移民潮時，即八九年前後，佢還是一名中學生，不了解為何幾乎有一半爸媽朋友搞移民，不少男女同學同佢講拜拜就去咗加澳紐。佢因緣際會，因做地產代理賣外國樓盤，去東南亞國家去得多，熟悉多國情況，而買樓客戶不時問埋：「買咗樓有冇居留權？」於是佢索性轉咗去做移民顧問兼外地樓盤代理。過去幾年生意過得去啦，點知天賜橫財，林鄭月娥做咗佢嘅財星，搞送中條例而雙手奉送大量生意畀佢。顧問何話：「查詢移民人士比2018年多幾倍，我簡直應接不暇，睇怕今年花紅獎金有着落，佣金都幾好。」
因乜事要移民？顧問何話：「最多人講嘅因素係為咗子女教育，其次係怕香港亂，第三係怕香港上海化，逐漸變成共產黨話晒事。」
咁講法，即係移民理由三十年不變，1980年代移民潮興起，我們一代人移民咪又係呢三大理由，回首前塵，移民咗嘅朋友多數係損失大過收益，當年放棄有好大上升空間嘅職位而走咗去加澳紐搵工，金錢損失不菲，到子女完成大學教育，21世紀又成家回流，唯一「淨增值」係多咗本外國護照，可以隨時再鬆人。至於子女在彼邦完成大學教育，基本上亦是有啲非常叻，有啲不過如是，更有啲讀唔成書。移民係為咗子女教育呢個理由，說服力唔夠十足。
最近聽到一個金融界精英叫朋友送子女去英國寄宿學校，以便他日適應移民生活，仲大聲講：「香港教育好衰，通識教育教壞人，去英國冇呢啲嘢，細路唔會學壞着黑衫上街。」我聽到幾乎笑爆嘴，細路去英國讀書唔會學玩民主、自由？在英國讀書會更愛中國？男女去英國寄宿學校唔會搞異性戀、同性戀、雜交、食大麻、啪丸仔？英國冇英國式嘅通識教育乎？
總之，一啲精英掛住搵錢，不想現狀受到任何衝擊，破壞佢地嘅收成期，於是怪責香港𡃁仔上街，而𡃁仔上街就係通識教育之錯。啲精英頭腦都算簡單，令人驚奇。究其實，幾十年來，香港人搞移民，最大最大之理由埋藏在心裏，就是避秦，恐怕中共鐵腕管治香港，清算有錢佬及異見人士。今有錢就移民馬爾他、葡萄牙，抵食兼方便。冇乜錢又多口批評大陸嘅，去大馬檳城或泰國曼谷住埋隱居，係次佳選擇。