黃大仙靈籤

上日博文引述占卜新冠疫情如何變化，聽聞堪輿學家李丞責博士到過黃大仙廟求籤，引文共享，以增對精準玄學的認識。

過往都會去幾間廟誠心拜神的李丞責博士，早前就提早於立春翌日連跑三間廟，包括上環濟公廟、北帝廟及黃大仙廟為香港人祈福，他說：「希望人人百毒不侵、個個幸福開心。」席間又買金箔黐鹿（寓意俸祿），望打工仔們事業財運都順利，還不忘為牛年的香港疫情、經濟、餐飲、旅遊及地產求籤問卜，李博士指本港疫情會慢慢安定，港人有機會去旅行，不過飲食業麻麻要繼續捱。

第廿五籤－五岳泰山：疫情逐漸穩定

泰山為五岳之首，群山比喻每個國家、城市，就如臣子上朝面聖般齊整、嚴肅地分兩排，置中的又怎會不開心呢？李博士預料：「香港因為次序分明同規矩，令疫情慢慢安定落嚟，穩如泰山，我哋應該開心嘅，大家無須太擔心，中國、香港比其他國家更穩陣，只要我哋跟規矩、齊齊整整、嚴肅面對呢件事，我哋就好快得到快樂。」

第七十九籤－蘇秦封相：經濟大致不俗

戰國時縱橫家不斷外交、搵謀略，令國與國之間得到信任，最終抵禦到秦國攻擊，而蘇秦獲各國認同封為宰相，李博士認為：「好多地方因為上市唔方便，或者政策及貿易意見唔協調，導致香港喺金融同經濟上有所得益，同時代表中國好多大企業會喺香港上市，信任香港嘅金融制度，令香港金融經濟企喺一個幾堅強嘅位置，亦吸引到外國商家嚟香港投資，所以呢個係幾好預兆，唔係太危險，反而農曆年尾要注意，股市經濟會有啲調整，要謹慎投資。」

第八十五籤－劉向高中：地產前段穩定

劉向寒窗苦讀十年終於高中狀元，衣錦還鄉，李博士指地產因通橋通路及有新政策，令籌劃多年的事情終實踐，令地產穩定兼吐氣揚眉，「投地成績可能更理想、投更高，豪宅亦賣得更好，但一般住宅租務就未必理想，甚至有回調跡象。而我哋問1年佢答10年，即農曆十月地產會有較大的調整，因農曆十月同四月對沖，調整位會喺呢段期間，咁夾埋經濟支籤睇，我會為10月後嘅股市樓市擔心，前段就唔錯。」

第廿六籤－水月鏡花：餐飲需待放寬

水月鏡花等於落花流水，飲食來說是虛浮的現象，未能實際地大反彈；同時形容感情未能圓滿開花結果，即不利於情投意合、結婚人士，李博士估計飲食業於上半年仍要捱，小本經營的酒吧及卡拉OK場所最辛苦，他說：「飲食可能有啲轉機，但好睇唔好食，即只能放寬一啲，難以去到擺酒、春茗、派對、喜慶宴會等，故未能做好大生意，除非月圓時候，起碼農曆七、八、九月先有轉機。」

第四十籤－伯牙碎琴：旅遊曇花一現

李博士直言：「下下籤都幾大鑊！」對於旅遊業來說是可一不可再，「陰陽各一方」可解讀為東西、南北，即局部地方去到，並非全面性，換句話可國內遊，想環遊世界就要等吓，他續道：「有啲地方係去到，有機會國與國之間放寬一次後又唔得。可能有啲慶典因為某啲突發問題而要暫時延遲，例如奧運或本來有啲大城市初步可以，但最後又要等。（放寬時段係幾時？）應該係秋天，大約下半年去一去又有停滯。」